6-நெருங்காதே நீரிழிவே! – டாக்டர் விஜயராகவன், சுஜாதா தேசிகன்


desikandr-vijayaraghavan

முதலில் நீரிழிவு சம்பந்தப்பட்ட இரண்டு பொய்களை உடைக்கலாம்.

1. நீரிழிவு குணப்படுத்த முடியாது என்பது.

2. ரத்தத்தில் சர்க்கரை அளவைக் குறைப்பது தான் சிகிச்சை என்று நம்புவது.”

நீரிழிவைச் சமாளிக்க வேண்டாம், சரி செய்யலாம் என்கிறீர்களா?”

ஆமாம். அதுதான் உண்மை. எதெல்லாம் சாப்பிட்டா இன்சுலின் சுரக்கும் என்று பார்த்துடலாம்.”

முன்பே மூணு விதமான சத்துக்களைப் பார்த்தோம் நினைவிருக்கா?”

கார்ப்(கார்போஹைடரேட்ஸ்), புரதம், கொழுப்பு.”

கீழே உள்ள படத்தைப் பாருங்க. என்ன புரியுது?”

கார்ப்ஸ், சர்க்கரை சாப்பிட்டபின் ரத்தத்தில் சர்க்கரை அளவு ஈபிள்டவர் மாதிரி உயர்ந்து விட்டதே.”

ஆமாம். இதை குளுக்கோஸ் ‘ஸ்பைக்’ என்போம். இப்படி சர்க்கரை ஸ்பைக் ஆச்சுன்னா என்ன ஆகும்?”

அதைக் கட்டுப்படுத்த இன்சுலின் சுரக்கும்.”

அதிக இன்சுலின் ஆபத்து என்று முன்பே பேசினோம். ஆக கார்ப் அதிகபட்சமாக இன்சுலினைத் தூண்டுகிறது, அடுத்து புரதம் மிதமான அளவுல தூண்டுது. கொழுப்பு மிகக் குறைவாக.”

ஒரு டவுட், டாக்டர்?”

கேளுங்க…”

சர்க்கரை மட்டும் இல்லாமல், கார்ப்ஸ் அதாவது மாவுச்சத்துகூட இப்படி ஸ்பைக் கொடுக்குமா?”

நல்ல கேள்வி. கார்ப்ஸ், சர்க்கரையும் வாக்குள்ள போச்சுனா எல்லாம் ஒண்ணுதான். அதாவது சாப்பிட்டபின் இரண்டும் குளுக்கோஸாக மாறிவிடும்.”

அப்ப கார்ப்ஸ் சாப்பிடக்கூடாதா?”

நீரிழிவு உள்ளவர்கள் மிக கம்மியாக சாப்பிட வேண்டும். மற்றவர்களும் குறைத்துக்கொள்வது பிற்காலத்துக்கு நல்லது.”

எதெல்லாம் கார்ப்ஸ் டாக்டர்?”

இந்தப் படத்தைப் பாருங்க.”

பல மருத்துவமனையில இந்த சார்ட்டை பார்த்திருக்கிறேன். ‘உணவு பிரமிட்’ ”

கீழே இருக்கும் உருளைக்கிழங்கு, பிஸ்கெட், பிரட், சோளம், கோதுமை, அரிசி போன்ற தானியங்களை அதிகமாகவும். உச்சியில் இருக்கும் எண்ணெய், வெண்ணெய் போன்ற கொழுப்பு வஸ்துக்களை கம்மியாய் சாப்பிட வேண்டும்.”

20 வருஷத்துக்கு முன்னாடி அமெரிக்கா வெளியிட்டது. அதை அப்படியே நாம கண்மூடித்தனமா நம்புவதுதான் எல்லா பிரச்னைகளுக்கும் காரணம்.”

என் பையன்கூட போன வாரம் ஸ்கூலில் ‘பாலன்ஸ்டு டயட்’ என்று இதை சார்ட் பேப்பரில் வரைந்துகொண்டு போனான்.”

பாருங்க, சின்ன வயதிலிருந்தே தப்பானதைப் பாடமாக்கி விட்டோம்.”

ஆனா பல மருத்துவமனைகளிலும் இந்த பிரமிட் படத்தைக் கொண்டு தானே டயட்டீசியன்கள் பரிந்துரைக்கிறார்கள்?”

என்ன செய்ய, இது மாதிரி சாப்பிட்டா, குண்டாகி, நீரிழிவு உள்ளவங்க மேலும் மேலும் மருந்து சாப்பிட்டுக்கொண்டே இருக்க வேண்டியதுதான்.”

ஏன் டாக்டர்?”

பிரமிட் படத்தின் கீழே என்னென்ன இருக்கு?”

தானியங்கள்-அரிசி, கோதுமை, சோளம் உருளைக்கிழங்கு, பிரட், பிஸ்கெட், பாஸ்தா, சேமியா…”

தானியங்கள் அதாவது அரிசி, கோதுமை எல்லாம் கார்ப்ஸ் (மாவுச்சத்து). உருளைக்கிழங்கு ஸ்டார்ச், பிரட், பிஸ்கெட், சேமியா, ரவை, பாஸ்தா, நூடுல்ஸ் எல்லாம் அரிசி அல்லது கோதுமையிலிருந்து செய்பவை. மைதாகூட இதில் அடங்கும் (அதைப் பற்றித் தனியாகப் பேசுவோம்).”

இதுக்கும் சர்க்கரைக்கும் என்ன சம்பந்தம்?”

கொஞ்சம் வேதியியல் (Chemistry) தெரிந்து கொண்டால் சுலபமாகப் புரியும்.”

இப்ப எதை வாங்கினாலும் சின்னதா பயனர் கையேடு (User Guide) கொடுக்கிறார்கள். அது மாதிரி நீரிழிவு இருப்பவர்களுக்கு அதைக் குணப்படுத்த ஒரு சின்ன கையேடு மாதிரி கொடுத்துவிடலாமா?”

நிச்சயமா. அதற்குமுன் கல்கி வாசகர்களுக்கு முக்கியமான சிலவற்றைத் தெளிவுப்படுத்த வேண்டும்.

1. உங்களுக்கு நீரிழிவு இருக்கிறது, மாத்திரை உட்கொள்கிறீர்கள் என்றால் நிச்சயம் உங்கள் டாக்டரை கன்சல்ட் செய்துவிட்டு அவர் ஆலோசனையின் பேரில் இந்த வழிமுறைகளைக் கடைப்பிடிக்கவும்.

2. மாத்திரை சாப்பிட்டுக் கொண்டு இந்த வழி முறைகளைக் கடைப்பிடிக்கும்போது சில சமயம் ‘தாழ் சர்க்கரை’ (low sugar) வர வாய்ப்பு இருக்கிறது. அதனால் இந்த வழிமுறைகளைக் கடைப்பிடிக்க விரும்புவோர் நிச்சயம் குளுக்கோமீட்டர் வைத்துக் கொள்ள வேண்டும்.’‘

ஆமாம். நீங்க சொன்னது மிக முக்கியம். இதைப் படித்துத் தமக்குத் தாமே வைத்தியம் பார்த்துக்கொள்ள கூடாது. இந்தத் தொடர் ஒரு விழிப்புணர்வுதான்.”

முதலில் நீரிழிவை குணப்படுத்த முடியும் என்ற நம்பிக்கை அவசியம். அதற்கு இரண்டு முக்கியமான விஷயங்களைக் கடைப்பிடிக்கணும். அது என்ன தெரியுமா?”

டயட், வாழ்க்கைமுறை மாற்றம்.

கரெக்ட். டயட் பற்றிச் சொல்லும் முன், கார்ப்ஸ் ஏன் கூடாது என்று சொல்றேன். நாலாம் கிளாஸ் பாடத்தில் ஒளிச்சேர்க்கை (Photosynthesis) சூரிய ஒளியைக்கொண்டு செடி எப்படி தனக்கு வேண்டிய சக்தியை உற்பத்தி செய்துக்கொள்கிறது?”

ஒளியைக்கொண்டு கார்பன்டை ஆக்சைடு + தண்ணீரை = கார்போஹைட்ரேடாக மாற்றுகிறது.”

இந்த கார்போஹைட்ரேட் என்கிற உயிரியல் மூலக்கூறுதான் செடி, கொடி, விலங்கு ஏன் ஆக்ஸிஜனே இல்லாத எரிமலையில் இருக்கும் பாக்டீரியா கூட உயிர்வாழ முக்கியமான எரிபொருள் சக்தி!”

நீரிழிவுக்கு சர்க்கரை கூடாது. ஆனா கார்ப்ஸ் ஏன் கூடாது? சர்க்கரைக்கும் இதுக்கும் என்ன தொடர்பு?”

அடுத்த பக்கத்தில் உள்ள படத்தைப் பாருங்க.”

எல்லாமே ஒரே மாதிரி இருக்கே.”

எல்லாம் கார்பன், ஹைட்ரஜன் மற்றும் ஆக்ஸிஜன் சேர்ந்த மூலக்கூறு அவ்வளவுதான். ஆனா அணுக்களின் அமைப்பைப் பாருங்க, வேறுபாடு தெரியும்.”

குளுக்கோஸ், ஆறுகோணம் (Hexagon) அமைப்பு, ஃப்ரக்டோஸ் ஐங்கோணம் (Pentagon).”

குளுக்கோஸ் பற்றி ஏற்கெனவே பார்த்துவிட் டோம், ஃப்ரக்டோஸ் எல்லா பழங்களிலும் கிடைக்கும் சர்க்கரை வகை. ஆனா இது குளுக்கோஸ் மாதிரி ரத்தத்தில கலந்து எல்லா இடங்களுக்கும் போக முடியாது. நேராக கல்லீரலுக்குப் போகும். இப்ப சுக்ரோஸ் படத்தைப் பாருங்க. என்ன புரியுது?”

குளூக்கோஸ், ஃப்ரக்டோஸ் – இது இரண்டும் ஆக்ஸிஜன் மூலமா கை கோத்துண்டு இருக்கு.”

அவ்வளவுதான். இதுதான் வீட்டில் ‘சீனி’ என்று செல்லமாக அழைக்கும் சுக்ரோஸ், வீட்டுல இருக்கும் தூய, வெள்ளை ஆனால் கொடிய விஷம்.”

விஷமா?”

ஆமாம். நிச்சயமா. சுக்ரோஸ் என்பது குளுக்கோஸ் மற்றும் ஃப்ரக்டோஸின் இணைப்பு. இப்படி இணைந்த வடிவத்தைத் தான் நாம கார்போஹைட்ரேட்டுனு சொல்றோம்.”

ஓ… சர்க்கரையின் ஊர்வலம்தான் கார்போஹைட்ரேட்.”

இரண்டு இணைந்தால் எளிய கார்போஹைட்ரேட் வகை; அதற்குமேலே இருந்தா காம்பிளக்ஸ் (சிக்கலான கார்போஹைட்ரேட்) வகை.”

அரிசி, கோதுமை, சோளம், ஓட்ஸ் போன்ற தானியங்கள், உருளை, சர்க்கரைவள்ளி போன்ற கிழங்குகள் சிக்கலான கார்போஹைட்ரேட் வகை.”

ஆனா டாக்டர் நிறைய பேருக்கு இந்த தானியம் தானே சாப்பாடு?”

இயற்கையை நாம் சரியா புரிந்துகொள்ள வில்லை. அதனால்தான் இன்று நாம அவதிப்பட்டுக் கொண்டு இருக்கிறோம். சரி, கரும்பு சாப்பிட்டு இருக்கீங்களா?”

பொங்கலின்போது வீட்டுக்கு ஒரு கரும்பு வாங்குவோம். நான் ஒண்ணரை அடி கடித்து சக்கை எல்லாம் துப்பிவிட்டு, சாப்பிட்டிருக்கிறேன்.”

ஒரு முழு கரும்பைச் சாப்பிடச் சொன்னா? என்ன செய்வீங்க?”

வாய் வலிக்கும், கரும்பு தின்ன நிச்சயம் கூலி வேண்டும்!”

யோசித்தால், நீங்க துப்பும் சக்கை எல்லாம் ஃபைபர், அதாவது நார்ச்சத்து. இயற்கை அன்னை மிகப் புத்திசாலி. நமக்குப் பழங்கள் கொடுக்கும் போது, அதில் இருக்கும் இனிப்பைத் தனியாகக் கொடுக்காமல் அதில் பல சத்துக்களை, நார்ச்சத்துடன் அழகாக பேக்கேஜ் செய்து நம்ம உடம்புக்கு ஏற்றவாறு கொடுக்கிறாள்.”

இப்ப ஆப்பிளும். ஒன்று சாப்பிடலாம், இல்ல இரண்டு. அரை டஜன் எல்லாம் சாப்பிட முடியாது. சரியா? ஆனா நாம என்ன செய்கிறோம்?”

புத்திசாலி என்று நினைத்துக் கொண்டு அரைக்கும் இயந்திரம் ஒன்றை வாங்கி அதில் நான்கு ஆப்பிளைப் போட்டு ஜூஸ் செய்து நார்ச்சத்தை நீக்கி ‘ஜூஸ்’ என்ற விஷத்தை மட்டும் வடி கட்டி அதில் எக்ஸ்ட்ரா ‘ஷுகர்’ சேர்த்து மேலும் விஷமாக்கி ஐஸ் போட்டுக் குடிக்கிறோம்.”

ஆனா குழந்தைகளுக்கு ஜூஸ் நல்லது என்கிறார்களே?”

இயற்கை அன்னை சொல்லவில்லை. விளம்பரங்களில் வரும் ‘காட்டன்’ புடைவை அன்னை சொல்றாங்க!”

இதில் ஒரு விஷயத்தைக் கவனிக்க வேண்டும். நார்ச்சத்தை எடுத்தால்தான் உணவை பேக் செய்து பல இடங்களுக்குச் சுலபமாக ஏற்றுமதி செய்ய முடியும். பலநாள் கெட்டுப்போகாமல் ‘ஷெல்ப் லைஃப்’ கூட்டமுடியும்.”

ஓ…”

நல்லா யோசித்துப் பாருங்க, நம் முன்னோர்களுக்கு இனிப்பு என்பது பழங்களில் மட்டும்தான் கிடைத்திருக்கும். அதுவும் சீசனின் போதுதான். நாம் ஸ்கூலில் படித்த காலத்துலகூட மாம்பழ சீசன், ஆப்பிள் சீசன், திராட்சை சீசன் என்று தான் இருக்கு. தீபாவளி, பொங்கல் என்று பண்டிகைகளின்போதுதான் இனிப்பு பலகாரங்கள்.”

இன்று வருடம் முழுக்க இறக்குமதி செய்யப் பட்ட எல்லா பழங்களும் கிடைக்கிறது. போதா குறைக்கு எங்கு பார்த்தாலும் ஸ்வீட் கடைகள், ஸ்நாக்ஸ் என்று எங்கும் பரவியிருக்கிறது.”

ஆமாம். அதனால் பல வருஷமா நீரிழிவு உள்ளவர்கள் அல்லது போனவாரம் தனக்கு நீரிழிவு என்று கண்டுபிடித்தவர்கள் தங்கள் உடம்பைச் சர்க்கரை பாட்டில் என்று நினைத்துக்கொள்ளுங்க. பல காலம் சர்க்கரை, பிரட், ஐஸ்கிரீம், ஸ்வீட் என்று சாப்பிட்டு அந்த பாட்டிலை நிரம்பி, அது வழியும் போது அதுதான் நீரிழிவு.”

இப்ப என்ன செய்யணும்?”

முதல் வேலை. அந்த பாட்டிலில் இருக்கும் சர்க்கரையைக் குறைக்கணும்.”

எக்ஸாக்ட்லி.”

இதுக்கு என்ன வழி டாக்டர்?”

முதல் ரூல் – நாக்கில் பட்ட உடன் இனிக்கும் வஸ்துக்களை குப்பை தொட்டியில் போட்டு விடுங்கள்.”

இரண்டாம் ரூல் – சர்க்கரை, கார்ப்ஸ் இரண்டையும் ஒன்றாகப் பார்க்கப் கற்றுக்கொள்ள வேண்டும். அடுத்த முறை உருளைக்கிழங்கை பார்த்தால் உங்க கண்ணுக்கு அது ஒரு கட்டி சர்க்கரையாகத் தெரிய வேண்டும்.”

Image showing folded Indian notes of 500 & 1000 Rs.

டாக்டர், கார்ப்ஸை எப்ப நிறுத்தணும்?”

பழைய 500, 1000 ரூபாய் நோட்டுக்கள் மாதிரி உடனே!”

கார்ப்ஸ் உயிரியல் மூலக்கூறு. நம் உடம்புக்கு அதுதான் எரிபொருள் சக்தி. அப்படி இருக்க கார்ப்ஸ் சாப்பிடாம எப்படி டாக்டர்?”

நாம் சாப்பிடும் கறிகாய் எல்லாவற்றிலும் நார்ச்சத்துடன் கொஞ்சம் கார்ப்ஸ் இருக்கு (Low Carb). அது போதும்.”

மூன்றாம் ரூல்: மாற்று எரிபொருளாக நிறைய கொழுப்பைச் (High Saturated Fat) சாப்பிட வேண்டும்.”

கொழுப்பையா? வெண்ணெய், நெய், பன்னீர் போன்றவற்றைச் சாப்பிடலாமா? பிரச்னை வராதா?”

வராது! நம் உடல் இத்தனை நாள் பெட்ரோல் என்ஜின் மாதிரி மாவுச்சத்தில் இயங்கிக்கொண்டு இருந்தது, அதை டீசல் என்ஜின் மாதிரி கொழுப்பில் இயங்க வைக்கணும்.”

இது எப்படி சாத்தியம்?”

நம் உடலுக்குச் சக்தி இரண்டு முறைகளில் கிடைக்கிறது. கார்பிலிருந்து கிடைப்பது குளுக்கோஸ். கொழுப்பிலிருந்து கிடைப்பது கீடோன். குளுக்கோஸ். கேஸ் அடுப்பு மாதிரி குப்பென்று கிடைக்கும் சக்தி. ஆனால் கீடோன், விறகு அடுப்பு மாதிரி. நின்று நிதானமாக எரியும். நம் உடலை இப்ப விறகு அடுப்பு மாதிரி மாற்றப் போகிறோம்.”

இப்ப என்னெல்லாம் சாப்பிடக் கூடாது?”

தவிர்க்கவேண்டிய உணவுப் பட்டியல்:

1. இனிப்பு – சர்க்கரை, தேன், வெல்லம், கருப்பட்டி, நாட்டுச்சர்க்கரை, செயற்கை இனிப்பூட்டி, பழச்சாறு.

2. தானியங்கள் – அரிசி, சிறுதானியங்கள் (கம்பு, தினை, வரகு), கோதுமை, ரவை, சேமியா, மைதா.

3. சோளம், ஓட்ஸ், கார்ன் பிளேக்ஸ், சோயா.

4. பிரட், கேக், பிஸ்கெட் போன்ற பேக்கரி ஐட்டங்கள்.

5. பீட்ஸா, பர்கர், பாஸ்தா, நூடுல்ஸ் போன்ற இறக்குமதி வகைகள்.”

தலை சுத்துது டாக்டர், அப்ப நாங்க ஒண்ணுமே சாப்பிட முடியாதுபோல. தமிழ்நாட்டுல இட்லி வடை, பொங்கல் இல்லாம எப்படி?”

அரிசியுடன் உளுந்து – இட்லி, பயத்தம் பருப்புடன் பொங்கல், கைய வெச்சா கார்போஹைட்ரேட்.”

காலை டிபன் என்ன சாப்பிடுவது?”

காய்கறி சாலட் எவ்வளவு வேண்டும் என்றாலும் சாப்பிடலாம். பாதாம், வால்நட், பிஸ்தா அல்லது ஒரு கைபிடி வறுத்த வேர்க்கடலைகூட சாப்பிடலாம், இல்லை அரை மூடி தேங்காய் சாப்பிடலாம். (சாலட் செய்முறை குறிப்பு பார்க்கவும்.)

நான்காவது ரூல் : காலை உணவு என்பது அவசியம் இல்லை. பசிக்கும்போது மட்டும் சாப்பிட்டா போதும்.”

அடுத்த அதிர்ச்சி. பிரேக் ஃபாஸ்ட் இல்லையா?”

இப்ப ஒரு சின்ன பிரேக்.

அடுத்த வாரம் பார்க்கலாம்.”

-நன்றி கல்கி

5c சாலட்

5c என்றால் (Cabbage, Capsicum, Cauliflower, Carrot & Cottage Cheese (Paneer) என்று பொருள்.

கோஸ் (பச்சை, ஊதா ) – 250 கிராம், குடை மிளகாய் – சிவப்பு-1,மஞ்சள்-1, பச்சை-1, காலிஃப்ளவர் – 10 உதிரிப்பூ, ஒரு மீடியம் சைஸ் காரட், இரண்டு ஸ்பூன் ஆலிவ் ஆயில், 100 கிராம் பன்னீர் (வெண்ணெயில் வதக்கியது). செய்முறை : காய்கறிகளைச் சுத்தம்செய்து சீராக நறுக்கிக் கொள்ளவும். அதன்மீது இரண்டு ஸ்பூன் ஆலிவ் எண்ணெயைத் தெளித்து, சிறிது உப்பு சேர்த்து ஐந்து நிமிடம் மைக்ரோவேவ் அவனில் நார்மல் மோடில் வைத்து எடுத்துவிடவும். அதன் மேலே கொஞ்சம் மிளகு தூவினால் சிம்பிள் சாலட் ரெடி!

4 thoughts on “6-நெருங்காதே நீரிழிவே! – டாக்டர் விஜயராகவன், சுஜாதா தேசிகன்

  1. rjagan49 December 1, 2016 at 6:34 PM Reply

    Rombavae bayamaaga idikkirathu. Vaazhaiyadi vaazhaiyaaga vantha unavup pazhakkththai niruththuvathu rombavae kashtam.

  2. vinnagaram varadhan December 2, 2016 at 12:54 AM Reply

    நம்பெள்ளாம் சோத்தால அடிச்ச மாடு. சாதம் இல்லன்னா எப்படி.

  3. vethalapotti December 2, 2016 at 2:32 AM Reply

    I have been on this paleo diet ( to an extent of 90%) since 5th November 2016. Stopped the sugar tablets. My weight has come down by 5kgs. More than anything, I feel very light always (though I am 99kgs now) and don’t feel tiresome. Thanks to Paleo & Dr. Vijayaraghavan.

  4. -எஸ்.ராமசாமி, ஈரோடு December 4, 2016 at 6:14 PM Reply

    ‘நெருங்காதே நீரிழிவே’ படித்தேன். எடுத்த எடுப்பிலேயே நோய் பற்றி விவாதிக்காமல் நமது உடம்பை கம்ப்யூட்டருடன் ஒப்பிட்டு நமது உடல் பற்றி விளக்கியுள்ளது அருமையான பாலபாடம். பாலபாடம் தெரிந்தால்தான் அடுத்த பாடம் எளிதாகப் புரியும். ஆக இத்தொடர் நீரிழிவு நோயாளிகளுக்கு வரப்பிரசாதமாக அமையும் என்பதில் ஐயமில்லை.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s